வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை.
(யோவான் 14:6)




காவல்துறை அதிகாரி நியமனத்திற்கு கர்தினால் இரஞ்சித் எதிர்ப்பு!

இலங்கையில் 2019-ஆண்டு உயிர்ப்பு ஞாயிறன்று நிகழ்ந்த குண்டுவெடிப்பு வழக்கில் குற்றம் சாட்டப்பட்ட அதிகாரி ஒருவரை அந்நாட்டின் உயர்மட்ட காவல்துறை அதிகாரியாக நியமித்ததற்கு எதிராகக் கொழும்பு பேராயர் கர்தினால் மால்கம் இரஞ்சித் அவர்கள் நீதிமன்றத்தில் மனு தாக்கல் செய்துள்ளதாக யூகான் செய்தி நிறுவனம் தெரிவித்துள்ளது. Deshabandu Tennekoon-வை அந்நாட்டின் காவல்துறைத் தலைவராகத் தற்காலிக அரசுத் தலைவர் இரணில் விக்கிரமசிங்க அவர்கள் நியமித்துள்ள வேளை, இதனை எதிர்த்து, மார்ச் 12, இச்செவ்வாயன்று, உச்ச நீதிமன்றத்தில் மனுத்தாக்கல் செய்துள்ளார் கர்தினால் இரஞ்சித் என்று அச்செய்தி நிறுவனம் மேலும் தெரிவிக்கிறது.
கர்தினால் இரஞ்சித் அவர்கள் CPA எனப்படும் ஒரு பொதுக் கொள்கை ஆய்வுக் குழுவுடன் இணைந்து இந்த மனுவை உச்ச நீதிமன்றத்தில் தாக்கல் செய்துள்ளதாகவும், இந்த நியமனம் சட்டவிரோதமானது என்று அம்மனுவில் சுட்டிக்காட்டியுள்ளதாகவும் அச்செய்திக் குறிப்பு உரைக்கிறது. 2019-ஆம் ஆண்டு, உயிர்ப்பு ஞாயிறன்று நிகழ்ந்த குண்டுவெடிப்புகளை விசாரித்த அரசுத் தலைவரின் விசாரணை ஆணைக்குழு, அவற்றைத் தடுக்கத் தவறியதாக Tennekoon மீது குற்றஞ்சாட்டிய போதிலும், 2023-ஆம் ஆண்டு நவம்பர் 29-ஆம் தேதியன்று அரசுத் தலைவர் விக்கிரமசிங்க அவர்களால் அவர் பொறுப்பு-காவல்துறைத் தலைவராகப் பதவி உயர்வு பெற்றார் என்றும் அச்செய்திக் குறிப்பில் குறிப்பிடப்பட்டுள்ளது.
கொழும்பில் உள்ள மூன்று கிறிஸ்தவ வழிபாட்டுத்தலங்கள் மற்றும் மூன்று சொகுசு உணவு விடுதிகளில் ஒரே நேரத்தில் குண்டு வெடித்ததில் வெளிநாட்டினர் உட்பட 273 பேர் கொல்லப்பட்டனர் மற்றும் 500-க்கும் மேற்பட்டோர் காயமடைந்தனர். [2024-03-14 22:51:51]


இலங்கையின் இரத்னபுரா மறைமாவட்டத்திற்கு புதிய ஆயர்

இலங்கையின் இரத்னபுரா மறைமாவட்டத்தின் ஆயர் கிளீட்டஸ் சந்திரசிரி பெரெரா அவர்கள் பணி ஓய்வு பெறுவதை ஏற்றுக்கொண்ட திருத்தந்தை பிரான்சிஸ் அவர்கள் அம்மறைமாவட்டத்திற்கு புதிய ஆயரை நியமித்துள்ளார். 2007ஆம் ஆண்டு முதல் இரத்னபுரா மறைமாவட்டத்தின் ஆயராக பணியாற்றிவரும் 76 வயதான ஆயர் கிளீட்டஸ் பெரெரா அவர்கள் ஓய்வு பெறுவதையொட்டி, அம்மறைமாவட்டத்திற்கு சிலாவ் மறைமாவட்டத்தின் அருள்பணியாளர் Peter Antony Wyman Croos அவர்களை புதிய ஆயராக நியமித்துள்ளார் திருத்தந்தை பிரான்சிஸ். 1967ஆம் ஆண்டு சிலாவில் பிறந்த புதிய ஆயர் ஆண்டனி குரூஸ் அவர்கள், கண்டியிலுள்ள இலங்கை நமதன்னை தேசிய குருமடத்தில் தத்துவ இயல் மற்றும் மெய்யியல் வகுப்புக்களை முடித்து 2000மாம் ஆண்டு சிலாவ் மறைமாவட்டத்திற்கென அருள்பணியாளராக திருப்பொழிவுச் செய்யப்பட்டார். அனுராதபுரத்தின் புதிய ஆயராக திருத்தந்தையால் நியமிக்கப்பட்டுள்ள அருள்பணி ஆன்டனி குரூஸ் அவர்கள், இத்தாலியின் நேப்பிள்ஸ் நகரிலும் 2011 முதல் 2014 வரை தன் மேற்படிப்பை மேற்கொண்டுள்ளார். [2024-03-05 22:42:47]


கிறிஸ்துமஸ் பெருவிழா பகிர்வின் அடையாளமாக அமையட்டும்!

பொருளாதார நெருக்கடியால் பாதிக்கப்பட்டுள்ள இலங்கையில் இலட்சக்கணக்கானவர்கள் உணவின்றி வாடும் வேளையில், இந்தக் கிறிஸ்துமஸ் பெருவிழாவில், பசியால் வாடும் ஏழைகளுடன் உணவை பகிர்ந்து கொள்ளுமாறு கிறிஸ்தவர்களை வலியுறுத்திக் கேட்டுக்கொண்டுள்ளார் அதன் கொழும்பு பேராயர் கர்தினால் மால்கம் இரஞ்சித்
தலைநகர் கொழும்பில் உள்ள பேராயர் இல்லத்தில், டிசம்பர் 19, இச்செவ்வாயன்று, செய்தியாளர்களிடம் பேசிய கர்தினால் இரஞ்சித், இத்தீவு நாட்டின் நிலைமை பேராபத்தில் உள்ளது என்றும் தெரிவித்தார்.
அதிக எண்ணிக்கையிலான குடும்பங்களுக்கு சரியான வாழ்வாதாரம் இல்லை என்று கூறிய கர்தினால் இரஞ்சித் அவர்கள், நான்கு பேர் கொண்ட ஒரு குடும்பத்திற்கு மாதாந்திர செலவுகளுக்கு 120,000 இலங்கை ரூபாய் (அமெரிக்க டாலர் 371) தேவைப்படுகிறது என்றும், ஆனால் ஒரு குடும்பத்தின் சராசரி மாத வருமானம் 241 அமெரிக்க டாலர்கள் மட்டுமே என்று கூறும் அண்மைய ஆய்வையும் அச்செய்தியாளர் சந்திப்பின்போது எடுத்துக்காட்டினார் கர்தினால் இரஞ்சித். மேலும் இந்தப் பணத்தைக் கொண்டு, குழந்தைகளின் பள்ளிப்படிப்பையோ, உணவையோ பெற முடியாது, அல்லது மின்சாரம், தண்ணீர், சமையல் எரிவாயு மற்றும் பிற பொருள்களுக்குப் பணம் செலுத்த முடியாது என்றும் மக்களின் நிலை குறித்த தனது ஆழ்ந்த கவலைய வெளிப்படுத்தினார் கர்தினால் இரஞ்சித்.
இந்நாட்டிலுள்ள 2 கோடியே 22 இலட்ச மொத்த மக்களில், பெருமபான்மையானவர்கள் கிறிஸ்தவர்கள் என்றும் இவர்களில் 7 விழுக்காட்டினர் கத்தோலிக்கர்கள் என்றும் சுட்டிக்காட்டிய கர்தினால் இரஞ்சித் அவர்கள், இந்நாட்டின் வரலாற்றில் இவர்கள் மிக மோசமான பொருளாதார நெருக்கடியை அனுபவித்து வருகின்றனர் என்றும் எடுத்துக்காட்டினார்.
இந்நிலையில் கத்தோலிக்கர்கள், மற்ற அனைத்து கிறிஸ்தவர்கள் மற்றும் நல்லெண்ணம் கொண்ட பிற மக்கள் யாவரும், இந்த ஆண்டு கிறிஸ்து பிறப்புப் பெருவிழாவில் தங்களிடம் இருப்பதை, அவர்களைச் சுற்றியுள்ள ஏழை எளிய மக்களுடன் பகிர்ந்துகொள்ள வேண்டும் என்று வலியுறுத்தியுனார் கர்தினால் இரஞ்சித். (UCAN) [2023-12-20 22:45:55]


இராஜபக்சேக்கள் குற்றவாளிகள் என இலங்கை உச்ச நீதிமன்றம் தீர்ப்பு!

செல்வராஜ் சூசைமாணிக்கம் - வத்திக்கான் இலங்கையில் ஏற்பட்ட மிகக் கடுமையான பொருளாதார நெருக்கடியில் இராஜபக்சேக்கள் குற்றவாளிகள் என்று அந்நாட்டின் உச்ச நீதிமன்றம் தீர்ப்பளித்துள்ளதாகத் தெரிவித்துள்ளது யூகான் செய்தி நிறுவனம்.
இரண்டு முன்னாள் அரசுத்தலைவர்கள் உட்பட வலிமை வாய்ந்த இராஜபக்சே சகோதரர்கள் பொருளாதாரத்தை தவறாகக் கையாண்டதன் மூலம் அந்நாட்டின் மோசமான நிதி நெருக்கடியைத் தூண்டியதற்காக, குற்றவாளிகள் என்று இலங்கையின் உச்ச நீதிமன்றம் நவம்பர் 14 இச்செவ்வாய்யன்று, இந்தத் தீர்ப்பை வழங்கியுள்ளதாகவும் அச்செய்தி நிறுவனம் கூறியுள்ளது. முன்னாள் அரசுத் தலைவர்கள் மற்றும் மூத்த அதிகாரிகள் பொருளாதாரத்தை தவறாகக் கையாளுதல் அல்லது செயலற்ற தன்மை, மற்றும், மக்களின் அடிப்படை உரிமைகளை மீறுவதாகக் கூறி நாங்கள் நீதிமன்றத்தை நாடினோம்" என்று TISL-ன் வழக்கறிஞர் Nadishani Perera அவர்கள், AFP செய்தியிடம் கூறியதாகவும் யூகான் செய்தி நிறுவனம் குறிப்பிட்டுள்ளது. மனுதாரர்கள் பொதுமக்களின் நலன் கருதி நீதிமன்றத்திற்கு வந்து தங்களுக்கு இழப்பீடு கோரவில்லை என்பதால், மனுதாரர்களுக்கு ஏற்படும் செலவுகளைத் தவிர வேறு இழப்பீடு வழங்க உத்தரவிட நீதிமன்றம் விரும்பவில்லை என்றும் TISL அமைப்பு தெரிவித்துள்ளதாகவும் கூறியுள்ளது அச்செய்தி நிறுவனம்.
Transparency International Sri Lanka (TISL) என்ற ஊழல் கண்காணிப்பு அமைப்பு மற்றும் ஏனைய நான்கு செயற்பாட்டாளர்களினால் முன்னாள் அரசுத் தலைவர்களான கோத்தபய இராஜபக்சே மற்றும் மகிந்த இராஜபக்சே உள்ளிட்ட உயர்மட்ட முன்னாள் அதிகாரிகளுக்கு எதிராக இந்த வழக்கு தாக்கல் செய்யப்பட்டுள்ளது. மேலும் இவ்வழக்கில் அவர்களது இளைய சகோதரரும், முன்னாள் நிதியமைச்சருமான பசில் இராஜபக்சே, இரண்டு முன்னாள் மத்திய வங்கி ஆளுநர்கள் மற்றும் ஏனைய உயர் கருவூல அதிகாரிகளும் அடங்குவர் (UCAN) [2023-11-15 22:15:24]


ஜனநாயகத்திற்கு ஆபத்தை விளைவிக்கும் சட்டங்கள்

இலங்கை அரசுக்கு எதிரான நடவடிக்கைகளின் ஈடுபடுபவர்கள் மற்றும் சந்தேகிக்கப்படும் நபர்கள் மீது குற்றஞ்சாட்டுவதற்கான அதிகப்படியான அதிகாரங்கள் வழங்கப்படுவது மிகுந்த வருத்தத்தை அளிக்கின்றன என்றும், பயங்கரவாதத்திற்கு எதிரான சட்டங்கள் நீதி மற்றும் ஜனநாயகத்திற்கு உண்மையான ஆபத்தை விளைவிக்கக் கூடியவை என்றும் கூறியுள்ளார் கர்தினால் மால்கம் இரஞ்சித்.
அண்மையில் நடைபெற்ற Ad Limina Apostolorum என்னும் திருத்தந்தையுடனான ஆயர்கள் சந்திப்பை முன்னிட்டு உரோமிற்கு வருகை தந்துள்ள கொழும்பு பேராயர் கர்தினால் மால்கம் இரஞ்சித் அவர்கள் இலங்கயின் தற்போதைய நிலை குறித்து பீதேஸ் என்னும் கத்தோலிக்க செய்தி நிறுவனத்திற்கு இவ்வாறு பதிலளித்துள்ளார். அண்மைய ஆண்டுகளில் இலங்கையானது அரசியல், சமூக மற்றும் பொருளாதாரப் பிரச்சினைகளை எதிர்கொண்டு வரும் சூழலில் நாட்டின் நிலைமையில் எந்தவிதமான முன்னேற்றமும் ஏற்படவில்லை என்றும், மக்களிடையே அமைதியற்ற சூழலையும் அதிருப்தியையும் உருவாக்கும் நோக்கத்தில் கடுமையான சமூகக் கட்டுப்பாட்டு முறைகள் அறிமுகப்படுத்தப்படுகின்றன என்றும் கூறியுள்ளார் கர்தினால் இரஞ்சித். நாட்டில் ஜனநாயக சூழலை உருவாக்கவும் சாதாரணமாக நடைமுறைப்படுத்தவும் கடுமையான இடையூறுகளை அனுபவித்து வருவதாக எடுத்துரைத்துள்ள கர்தினால் இரஞ்சித் அவர்கள், பாதிக்கப்படும் கத்தோலிக்க மக்கள் மட்டுமல்லாது ஒட்டுமொத்த இலங்கை நாட்டில் வாழும் மக்களையும் நினைவுகூர்வதாக எடுத்துரைத்துள்ளார்.
சமூக மற்றும் பொருளாதார நெருக்கடியினால் பல குடும்பங்கள் பாதிக்கப்படுகின்றனர் என்றும், மொத்த மக்கள்தொகையில் மூன்றில் ஒரு பங்கு மக்கள் நாளொன்றிற்கு ஒருமுறை மட்டுமே உணவு உண்ணும் சூழலில் இருக்கின்றனர் என்றும் சுட்டிக்காட்டியுள்ளார் கர்தினால் இரஞ்சித். இலங்கையில் வாழும் பௌத்தர்கள், இந்துக்கள் என அனைத்து மதத்தலைவர்களுடனான உரையாடலில் ஒன்றிணைந்து நல்லுறவைப் பேணிக்காப்பதாக எடுத்துரைத்துள்ள கர்தினால் இரஞ்சித் அவர்கள், இப்பாதை கடினமானதாகத் தோன்றினாலும் தொடர்ந்து தங்களது பங்கைச் செய்வோம், எப்போதும் மக்கள் பக்கம் இருப்போம் என்றும், நம்பிக்கையுடன் பொதுநலனுக்காக உழைத்து, நற்செய்தியின் உண்மைக்கு சாட்சியாக இருப்போம் என்றும் கூறியுள்ளார். இலங்கை அரசிற்கு எதிரான அணிவகுப்பு, சமூகப் போராட்டம் ஆகியவற்றைக் கட்டுப்படுத்த இராணுவத்தை நிலைநிறுத்தும் அரசின் செயல்களை சுட்டிக்காட்டியுள்ள கர்தினால் இரஞ்சித் அவர்கள், 2024 இல் திட்டமிடப்பட்டுள்ள அரசியல் தேர்தல்கள் மிக முக்கியமானதாகவும், மக்களின் விருப்பத்தை வெளிப்படுத்துவதாகவும் அமையும் என்றும் கூறியுள்ளார். ( fides) [2023-11-12 23:27:29]


வெடிகுண்டு தாக்குதல்குறித்த உண்மைக்கு இலங்கை திருஅவை விண்ணப்பம்

2019ஆம் ஆண்டு ஏப்ரல் மாதம் 21ஆம் தேதி, உயிர்ப்பு ஞாயிறன்று கொழும்புவில் இடம்பெற்ற எட்டு குண்டுவெடிப்புக்கள் குறித்த விசாரணைகள் அக்டோபர் 18ஆம் தேதி இப்புதனன்று மீண்டும் துவங்கவுள்ள நிலையில், அனைத்துலக அளவிலான சுதந்திர விசாரணைக்குழு நியமிக்கப்பட வேண்டும் என மீண்டும் தன் விண்ணப்பத்தை முன்வைத்துள்ளது இலங்கை தலத்திருஅவை.
2019ஆம் ஆண்டு வெடிகுண்டு தாக்குதல்களில் இராணுவ உளவுப் பிரிவின் பங்கு ஆராயப்பட வேண்டும், நீதியான, வெளிப்படையான விசாரணைகள் இடம்பெற வேண்டும் என விண்ணப்பம் ஒன்றையும் விடுத்துள்ளது தலத்திருஅவை. குண்டுவெடிப்புக்கள் குறித்த உண்மை கண்டறியப்பட்டு, உயிரிழந்த மற்றும் காயமுற்ற அப்பாவி மக்களுக்கு நீதி கிட்டவேண்டும் என அரசு உண்மையிலேயே விரும்பினால், இலங்கை கத்தோலிக்கத் திருஅவையின் விண்ணப்பங்களை ஏற்க வேண்டும் என அரசுக்கு அழைப்பு ஒன்றையும் விடுத்துள்ளது.
இலங்கை அரசுத்தலைவருக்கு கர்தினால் மால்கம் இரஞ்சித் உட்பட கத்தோலிக்க மற்றும் கிறிஸ்தவ பிரிந்த சபைகளின் 30 தலைவர்கள் இணைந்து கையெழுத்திட்டு அனுப்பியுள்ள இந்த கடிதம், குண்டுவெடிப்பாளர்களுடன் இராணுவ உளவுப்பிரிவு மற்றும் அரசு உயர் அதிகாரிகளின் தொடர்பு ஆராயப்பட வேண்டும் எனவும் விண்ணப்பிக்கிறது. 2019ஆம் ஆண்டு உயிர்ப்பு ஞாயிறன்று இடம்பெற்ற வெடிகுண்டு தாக்குதலில் 45 வெளிநாட்டவர்கள் உட்பட 279பேர் கொல்லப்பட்டனர், 500க்கும் மேற்பட்டோர் காயமுற்றனர். இக்குண்டுவெடிப்புத் தொடர்பாக 24 பேர் தற்போது விசாரணைகளை எதிர்நோக்கிக் காத்திருக்கின்றனர். [2023-10-18 22:21:39]


இலங்கையில் புதிய மசோதாவுக்கு எதிர்ப்பு!

பாராளுமன்றத்தில் விவாதத்திற்கு பட்டியலிடப்பட்டுள்ள இலங்கை அரசின் ‘ஆன்லைன் பாதுகாப்பு சட்டமூலத்தின் சட்டப்பூர்வ தன்மையை’ ஊடக அமைப்புகள், அரசியல் கட்சிகள் தலத் திருஅவை மற்றும் உரிமைகள் குழுக்கள் சவாலுக்கு உட்படுத்தியுள்ளதாக யூகான் செய்தி நிறுவனம் தெரிவித்துள்ளது. இதுகுறித்து கருத்துத் தெரிவித்த கொழும்பு பேராயர் கர்தினால் மால்கம் இரஞ்சித் அவர்கள், ஆன்லைன் பாதுகாப்பு ஆணையத்தின் தலைவர் மற்றும் உறுப்பினர்களை நியமிக்க அல்லது நீக்க தன்னிச்சையான மற்றும் நியாயமற்ற பரந்த அளவிலான அதிகாரங்கள் இதன் வழியாக அந்நாட்டின் அதிபருக்கு வழங்கப்பட்டுள்ளன என்று தனது எதிர்ப்பை வெளிப்படுத்தினார்.
மேலும் இந்த விவகாரத்தில் பொது வாக்கெடுப்பு நடத்த உத்தரவிட வேண்டும் என்றும், மூன்றில் இரண்டு பங்கு பெரும்பான்மை வாக்கெடுப்பின்றி நாடாளுமன்றத்தில் இம்மசோதாவுக்கு ஒப்புதல் அளிக்க முடியாது என்றும் உச்ச நீதிமன்றத்தை வலியுறுத்தியுள்ளார் கர்தினால் இரஞ்சித். அக்டோபர் 3-ஆம் தேதி முதல் வாசிப்புக்காக இந்த மசோதா நாடாளுமன்றத்தில் தாக்கல் செய்யப்பட்டுள்ள வேளை, ஆபாசப் படங்கள் மற்றும் ஆன்லைன் மோசடி போன்ற எதிர்மறையான தாக்கங்களிலிருந்து குழந்தைகள் மற்றும் பெண்களைப் பாதுகாப்பதே இம்மசோதாவின் நோக்கம் என்று அந்நாட்டின் அரசு கூறியுள்ளது.
இம்மசோதாவை எதிர்த்துத் தொடரப்பட்ட மனுக்களை அக்டோபர் 10-ஆம் தேதி அந்நாட்டின் உச்சநீதி மன்றம் விசாரிக்கத் தொடங்கிய நிலையில், இது அக்டோபர் 20-ஆம் தேதி வரை தொடரும் என்றும் தெரிவித்துள்ளது. இலங்கையில் ஏற்பட்ட கடுமையான பொருளாதார நெருக்கடியின் உச்சக்கட்டத்தில் கடந்த ஆண்டு ஆட்சிக்கு வந்ததில் இருந்து அந்நாட்டின் அதிபர் விக்கிரமசிங்கே அவர்கள் கருத்து வேறுபாடுகளை ஒடுக்கியதாகக் குற்றம் சாட்டப்பட்டு வருகிறார். (UCAN) [2023-10-18 22:19:57]


இலங்கை மலையகத் தமிழர்களின் உரிமைக்கானப் போராட்டம்!

இலங்கை பொருளாதாரத்தின் முதுகெலும்பாகத் திகழும் மலையகத் தமிழர்கள் மீதான அந்நாட்டு அரசின் அணுகுமுறை அவமானத்துக்குரிய ஒன்றாக இருக்கின்றது என்று குறிப்பிட்டுள்ளார் அருள்சகோதரி Deepa Fernando
மலையகத் தோட்டத் தொழிலாளர்கள், குடிமைச் சமூகப் பிரதிநிதிகள் மற்றும் மதத் தலைவர்களின் ஒரு சிறிய குழுவால் முன்னெடுக்கப்பட்ட 15 நாள் நடைபயண ஆர்ப்பாட்ட அணிவகுப்பின்போது ASIAN செய்திக்கு வழங்கிய நேர்காணலில் இவ்வாறு கூறியுள்ளார் அருள்சகோதரியும் சமூகச் செயல்பாட்டாளருமான Fernando.
எந்தவொரு ஆட்சியாளரும் இம்மக்களின் கூக்குரலுக்குச் செவிசாய்க்காத நிலையில், கடந்த 200 ஆண்டுகளாகத் துயருற்று வரும் இத்தோட்டத் தொழிலாளர்கள், குறிப்பாக, மலையகத் தமிழர்கள் மிகவும் ஒதுக்கப்பட்ட மற்றும் சுரண்டப்படும் நிலையில் வாழ்கின்றனர் என்பதை உறுதிப்படுத்துகிறது என்று சுட்டிக்காட்டியுள்ளார் அருள்சகோதரி Fernando.
மேலும் தேசியப் பொருளாதாரத்தின் முதுகெலும்பாக இருந்தும் இந்தச் சமூகங்கள் ஏன் இலங்கையின் குடிமக்களாக ஏற்றுக்கொள்ளப்படவில்லை என்று கவலையுடன் கூடிய கேள்வி ஒன்றையும்ய எழுப்பியுள்ளார் அருள்சகோதரி Fernando.
‘வேர்களை மீட்டு உரிமை வென்றிட’ என்ற விருதுவாக்கின் கீழ் ஒன்றிணைந்த பங்கேற்பாளர்கள் மற்றும் பெருந்தோட்டத் தொழிலாளர்கள் அனைவரும் தாங்கள் முன்வைத்துள்ள இந்தப் 11 கோரிக்கைகளுக்குத் தீர்வு காணுமாறும் அந்நாட்டு அரசுக்கு வேண்டுகோள் ஒன்றையும் விடுத்துள்ளனர். இந்த ஆர்ப்பாட்டத்தின்போது அந்நாட்டிற்கான காரித்தாஸ் அமைப்பும் இணைந்துகொண்டது. மலையகத் தமிழர்களால் முன்வைக்கப்பட்ட 11 கோரிக்கைகளில், இலங்கையில் உள்ள மற்ற சமூகங்களுக்கு இணையாக அவர்களும் முழு குடிமக்களாக அங்கீகரிக்கப்பட வேண்டும் என்பதும் முக்கியமான ஒன்று. (ASIAN ) [2023-08-20 00:24:40]


தமிழர் பிரச்சினை தொடர்பில் மோடிக்கு தமிழ் தேசிய மக்கள் முன்னணி கடிதம்

ஈழத் தமிழர்களுக்கான அரசியல் தீர்வு உள்ளிட்ட விடயங்களை சுட்டிக்காட்டி இந்திய பிரதமர் நரேந்திர மோடிக்கு தமிழ் தேசிய மக்கள் முன்னணி கடிதம் ஒன்றை அனுப்பி வைத்துள்ளது. இந்தியப் பிரதமருக்கான இக்கடிதத்தை யாழிலுள்ள இந்திய துணைத் தூதரகத்தில் கட்சியின் செயலாளரும் நாடாளுமன்ற உறுப்பினருமான செல்வராசா கஜேந்திரன் கையளித்துள்ளார்.
ஈழத் தமிழ் மக்களின் அடிப்படை பிரச்சனைகள் இலங்கை ஜனாதிபதி ரணில் விக்ரமசிங்க இந்த மாத இறுதியில் இந்தியாவிற்கு விஜயம் செய்து இந்தியப் பிரதமர் நரேந்திர மோடியை சந்திக்க உள்ளார். இந்த நிலையில் ஈழத் தமிழ் மக்களின் அடிப்படை பிரச்சனைகள் அரசியல் தீர்வுகளை சுட்டிக்காட்டி இலங்கை ஜனாதிபதிக்கு அழுத்தம் கொடுக்கும் வகையில் இந்தியப் பிரதமருக்கு தமிழ்க் கட்சிகள் பல இணைந்து ஒருமித்து கடிதம் அனுப்ப நடவடிக்கை எடுத்து வருகின்றன.
இவ்வாறானதொரு சூழலில் தமிழ்த் தேசிய மக்கள் முன்னணி தனியாக பிரதமருக்கு கடிதத்தை அனுப்பி வைத்துள்ளமை குறிப்பிடத்தக்கது. [2023-07-18 00:20:04]


மன்னாரில் மணிப்பூரில் இடம் பெறும் கிறிஸ்தவர்களுக்கு எதிரான வன்முறையை கண்டித்து கவனயீர்ப்பு போராட்டம்.

வடகிழக்கு இந்தியாவில் உள்ள மணிப்பூர் மாகாணத்தில் அண்மைக்காலமாக கிறிஸ்தவ மதத்தினருக்கு எதிராக இடம் பெறும் கட்டவிழ்த்து விடப்பட்ட வன்முறைக்கு எதிராகவும் உலக நாடுகள், இந்திய அரசாங்கம் குறித்த விடயத்தில் தலையிட வேண்டும் என கோரிக்கை விடுத்து கவனயீர்ப்பு போராட்டம் ஒன்று இடம்பெற்றுள்ளது. குறித்த கவனயீர்ப்பு போராட்டமானது மன்னாரில் இன்றைய தினம் (17.07.2023) திங்கட்கிழமை நடைபெற்றுள்ளது.
மன்னார் நகர் சுற்றுவட்ட பகுதியில் மன்னார் கிறிஸ்தவ மதத்தை சேர்ந்தவர்கள் இணைந்து பல்வேறு பதாகைகளை ஏந்தியவாறு குறித்த போராட்டத்தில் ஈடுபட்டிருந்தனர்.
தீவிரவாத அமைப்புக்களை கட்டுப்படுத்த வேண்டும் சிறுபான்மை இன மக்களை துன்புறுத்தும் தீவிரவாத அமைப்புக்களை உடனே தடை செய், உடைக்கப்பட்ட எரிக்கப்பட்ட வீடுகள், ஆலயங்களை உடனே புனரமைப்பு செய்து கொடு, சர்வதேசமே இந்திய கிறிஸ்தவர்களை உடனே கவனி, பாதிக்கப்பட்ட மக்களுக்கு நீதி விசாரணை உடனே செய் போன்ற பல்வேறு வாசகங்கள் எழுதப்பட்ட பதாகைகளை ஏந்தியவாறு போராட்டத்தில் ஈடுபட்டிருந்தனர். இலங்கை அரசாங்கமும் சர்வதேசமும் பதிக்கப்பட்ட கிறிஸ்தவ மக்களுக்கு ஆதரவாக பேச வேண்டும்.
அதே நேரம் இந்திய மத்திய அரசு இந்த கலவரத்திற்கு காரணமான தீவிரவாத அமைப்புக்களை கட்டுப்படுத்த வேண்டும் எனவும் கோரிக்கை விடுத்துள்ளனர். [2023-07-18 00:08:20]